O BNG do Porriño quere mostrar publicamente o seu apoio ó cadro de persoal do servizo de recollida do lixo do Concello do Porriño. Segundo o Bloque, as persoas traballadoras son as vítimas da situación creada pola falta dun convenio colectivo actualizado.

No Concello do Porriño hai un problema con este servizo que xa lle fora advertido dende a forza nacionalista no mes de novembro do ano pasado. SOGAMA incrementou o seu canon, co apoio do PP da Xunta de Galicia. Isto produciu un sobre custo para a empresa que pretende repercutilo nas condicións laborais das traballadoras e traballadores.

“O goberno municipal do PP é o responsable desta situación e como tal debe actuar. É o goberno de Alejandro Lorenzo quen ten que buscarlle unha solución a este conflito, o cal era predicible e do que xa o advertíramos como moi probable”, recorda Pedro Pereira, portavoz municipal do BNG do Porriño.