A Plataforma SOS Sanidade Pública viu rexeitado o apoio do goberno do PP porriñés
A través dos grupos da oposición, a plataforma presentou a petición de apoio do pleno do Porriño. Esta foi votada en contra polo PP. Nela demándaselle á Xunta de Galicia máis persoal na atención primaria do Porriño, tanto no centro de saúde como nas urxencias, así como que o Concello fletase un autobús para os cidadáns que queiran acudir o 6 de abril á manifestación en defensa da sanidade pública en Santiago de Compostela
O BNG e o PSdeG-PSOE do Porriño rexistraron unha moción conxunta para darlles voz ás reivindicacións da Plataforma SOS Sanidade Pública. A razón de usar este procedemento están en que a plataforma non consegue unha xuntanza coa Xunta de Galicia para trasladarlle a súa preocupación pola situación sanitaria que sufrimos en Galicia.
A través desta moción, solicitouse, na sesión plenaria celebrada este luns, unha maior dotación de efectivos no cadro de persoal do Centro de Saúde, para atender os servizos básicos diarios. Tamén se reclamaron certas especialidades como pediatría, atención temperá e radioloxía; así coma a cobertura de novas especialidades, como saúde mental, fisioterapia, servizos de farmacia e ambulancia en ruta.
“Pedímoslle ao Concello do Porriño que reclame con nós ante a Xunta unha solución á situación que vive O Porriño e o seu Centro de Saúde. Solicitámoslle tamén que materialice ese apoio financiando un autobús para que o maior número de persoas posible acuda o 6 de abril á manifestación en defensa da sanidade pública en Santiago de Compostela. O alcalde ten a oportunidade de posicionarse do lado dos intereses da cidadanía”.
Previa votación en contra do PP da petición da plataforma nesta moción conxunta, as declaracións da concelleira de Sanidade, Teresa Veloso, foron “surrealistas e lamentable”, segundo a oposición. Nelas afirmou que os doentes son “excesivamente demandantes”. Para o PP o colapso sanitario débese a que a poboación accode demasiado aos centros de saúde. “É máis doado culpar os doentes que confirmar a realidade da falla de medios persoais e dos recortes na sanidade pública.”
Dende a Plataforma SOS Sanidade Pública recoméndaselles ás persoas afectadas a que materialicen as queixas por escrito nos respectivos centros de atención primaria e hospitais, para que queden rexistradas debidamente. Tamén animan a que nos fagamos escoitar e saír ás rúas para esixir unha sanidade eficiente, por iso nos convidan a acudir á manifestación en defensa da sanidade pública o vindeiro domingo 6 de abril, en Santiago de Compostela. Desde os colectivos que integran a Plataforma ponse un autobús con parada no Porriño, interesadas reservar praza no 986610465.
