O grupo municipal do BNG levará ao pleno municipal que se celebrará o vindeiro mércores, 26 de maio, unha moción coa que persegue o apoio de toda a corporación para mostrar a rotunda oposición do Concello do Porriño ante a intención do goberno central de establecer peaxes nas autovías galegas de titularidade estatal. Considerámola unha medida regresiva que produciría un impacto negativo para as propias persoas usuarias das autovías, para a seguridade viaria e para a competitividade das nosas empresas. Un novo atranco para o desenvolvemento económico e a cohesión social de Galiza, máxime coa situación de aldraxe que continuamos a padecer na autoestrada AP9. Unha nova discriminación co noso país en materia de infraestruturas por parte dun estado que non ten problema á hora de rescatar ruinosas autoestradas como o caso das radiais madrileñas. Ao mesmo tempo, na moción presentada tamén queremos instar á Xunta de Galiza á redución e paulatina eliminación das peaxes da AG55 e AG57, de titularidade galega.

Modelo de enerxía eólica sustentábel

O BNG tamén vai presentar no pleno unha moción en defensa dun modelo de enerxía eólica sustentábel, xusta e galega. Galiza está a sufrir un boom eólico sen precedentes, esta expansión eólica está a desenvolvese sen unha adecuada planificación e control público e sen garantías para a participación social, a salvagarda do patrimonio natural e dos usos sociais e económicos do noso territorio. Este desenvolvemento que podería parecer positivo, estase a dar de forma abrupta, sen consenso coa sociedade dos lugares afectados e en moitos casos a través dunha fraudulenta fragmentación dos proxectos para ocultar o seu verdadeiro impacto. Estamos ante un modelo espoliador e depredador deseñado ás nosas costas e ao servizo das grandes empresas.

O Bloque proporá ao pleno demandar da Xunta un novo Plan Sectorial Eólico que conte cunha ampla participación dos axentes implicados e cun amplo proceso de exposición pública co fin de suscitar o maior consenso posíbel. Pretendemos garantir a socialización dos beneficios e o retorno económico apostando por unha empresa pública galega de enerxía que favoreza a participación da Xunta e dos concellos así como das persoas propietarias das terras. Defendemos que as autorizacións de novos parques eólicos deban estar vinculadas con proxectos industriais que xeren riqueza no país. Por último queremos incrementar a vixilancia sobre as garantías medio ambientais e asegurar o principio de prevalencia da protección ambiental sobre a ordenación territorial e urbanística. Como medida de prevención, solicitase a paralización cautelar dos proxectos de todos os parques eólicos, en proxecto ou en tramitación, que estean incluídos dentro de áreas propostas para a ampliación da Rede Natura e non autorizar novos parques que estean situados nestas zonas.