O BNG lamenta que a idea de conservación e lecer do PP para o Louro ao seu paso polo Porriño sexa a da artificialización e degradación do río e dos seus ecosistemas. O ruído e a contaminación non son compatibles coa protección do medio. O BNG do Porriño denuncia o actual proxecto do PP para o Louro e a súa contorna. Van cementar os ecosistemas do río con pistas de atletismo e aparcadoiros para coches; van promover o ruído e a contaminación do medio con concertos ou convertendo este espazo nun lugar para vodas. Estas intervencións non axudan á conservación do único espazo verde do centro da vila.

O río debe ser un ecosistema natural ben conservado; así será o garante para o paseo e o descanso das persoas, para a tranquilidade, para un lecer harmonioso e para fomentar o coñecemento do noso medio. “As festas de Alejandro deben buscar outras zonas de acomodo no Porriño; non debe ser o río Louro, novamente, o gran prexudicado por unha forma pouco seria de ver o medio natural”, sinalou o educador ambiental e concelleiro do Bloque, Marcelo Rodríguez.

Desde o BNG, reclamamos para o Louro o seu recoñecemento como Espazo Natural de Interese Local (ENIL), proxecto aprobado no pleno e que o PP mantén paralizado no Concello. “É unha ferramenta poderosa ao alcance da administración local para axudar a rexenerar os bosques de ribeira. O Alcalde non quere impulsalo porque defende outro modelo, incompatible con este recoñecemento ambiental”, lembrou o concelleiro nacionalista. “En lugar de seguir a degradar o río cos seus proxectos, o alcalde debera defender a protección do Louro e traballar no traslado do matadoiro. O Porriño precisa deixar de lle dar as costas ao seu pulmón verde natural”, reclamou Marcelo Rodríguez.

No seu día, o BNG abriu o paseo polo río e iniciou a compra de terreos na contorna fluvial, como primeiro paso para poder habilitar unha gran zona de uso público respectuosa co Louro. Sempre fomos conscientes de que a recuperación do río non será integral mentres o matadoiro permaneza na súa localización actual e o tren siga a cruzar polo medio da vila do Porriño, moi próximo a esta zona verde. “Alejandro Lorenzo vai ter sempre en fronte o BNG se sigue a atacar os valores ecolóxicos do Louro” advertiu o concelleiro, quen destacou a diferenza entre as políticas que defenden o ecosistema e o “desarrollismo” que defende o PP. Neste sentido, considera que “este goberno ten pouca credibilidade cando desenvolve actividades puntuais de repoboación no río con asociacións ecoloxistas; non podemos reforestar e eliminar invasoras un día e ó seguinte encher de cemento toda a ribeira”.