Abrir novas escolas infantís era prioritario no Porriño para atender a demanda crecente derivada do aumento poboacional e da chegada de novas familias. No concello, habendo preto de 800 nenos/as de 0 a 3 anos, cubríanse tan só o 15%, menos da metade da ratio de prazas públicas recomendadas pola UE. Nos últimos anos, moitas familias quedaban sen praza cada curso escolar pola insuficiente oferta pública.

O alcalde tiña anunciado que a creación de dúas novas escolas infantís sería unha realidade en 2025. A obra chega cun curso escolar de atraso, pero no último pleno municipal o goberno de Alejandro Lorenzo sorprende a opinión pública coa nova de que as escolas infantís van ser xestionadas desde o concello e non desde a Xunta.

O servizo de educación de 0 a 3 anos é competencia da Xunta de Galicia e está regulada a súa gratuidade desde o ano 2022 para todos os nenos e nenas, tanto as públicas, como as privadas. Así as escolas deben estar integradas na rede Galiña Azul coa finalidade de unificar criterios na atención educativa e para que a administración galega asuma a xestión. A gratuidade real desta etapa da ensinanza, no caso do Porriño, vai asumila o propio concello innecesariamente.

A xestión polo goberno galego destas escolas liberaría recursos municipais para outros cometidos locais. Esta decisión ideolóxica de Alejandro Lorenzo de negarse a ampliar a rede pública de escolas infantís só se pode explicar se hai un interese en favorecer a xestión indirecta dun servizo público.